Huawei şirkəti Azərbaycanda yeni layihəyədə iştirak edəcək
Çinin tanınmış IT şirkəti Huawei Azərbaycanda genişzolaqlı internet şəbəkəsinin yaradılması layihəsində iştirak edəcək.
Şirkətin bu layihəyə qoşulması məsələsi nazir vəzifəsini icra edən, Azərbaycanın Rabitə və yüksək texnologiyalar nazirinin birinci müavini Ramin Quluzadə Huawei şirkətinin baş direktoru Lyu Jianveylə görüşü zamanı müzakirə olunub.
1news.az Rabitə və Yüksək Texnologiyalar Nazirliyinin saytına istinadən xəbər verir ki, görüşdə Azərbaycanda genişzolaqlı şəbəkənin qurulması layihəsi və əməkdaşlığın perspektiv inkişafı müzakirə olunub.
“Huawei” şirkətinin baş direktoru Liu Jianvei layihə barədə ətraflı məlumat verərək bildirib ki, genişzolaqlı şəbəkənin qurulması kommunikasiya sahəsində dünyada mövcud olan ən son standartların tətbiqi üçün daha geniş imkanlar açır.
Nazir səlahiyyətlərini icra edən Ramin Quluzadə bildirib ki, kosmik sənayeyə malik olan Azərbaycan dövləti ölkədə keyfiyyətli rabitənin inkişafında maraqlıdır. R.Quluzadə layihənin keyfiyyətli icrası ilə yanaşı, bu işləri aparan milli kadrların hazırlanmasının prioritet olduğunu vurğuladı və qeyd etdi ki, peşəkar mütəxəssislərin hazırlanması üçün nazirlik lazımi şəraiti yaradacaq.
