MFL-də “All Stars” döyüşü başlayır
Küçə futbolunda yeni kult yaradan MFL meydanda başını və ayağını işlədə bilənləri bir araya toplayır. 42 komandadan təxminən 700 oyunçunun qatıldığı liqada iştirak edən “A” və “B” konferensiyaları yenidən üz-üzə gəlir.
1news.az-ın verdiyi xəbərə görə, bu dəfə onlar “All Stars” adı altında küçə futbolunda kimin nəyi bacardığını aydınlaşdıracaqlar.
“Divlərin döyüşü”ndə meydanın bir küncündə “A” Konferensiyasının ən güclüləri toplanıb! Meydanda onlarla qarşılaşan gücün nə demək olduğunu anlayır. Rəqib müdafiəyə keçibsə, o zaman yerini möhkəmlətsin. Çünki "pressinq-hücum" onların oyun üslubudur. Fiziki gücləri və döyüşçü cüssələri ilə meydanda qasırğa yaradan "A" Konferensiyası əsl küçə futbolu taktikasıyla gəlir!
Meydanın digər küncündə “B” Konferensiyasının “ağır artilleriya”sı dayanıb! Dəqiq hücum, kombinasiyalı oyun, şəxsi fiziki göstəriciləri sayəsində qarşısıalınmaz sürət – bax, bu keyfiyyətlər onları meydanda məğlubedilməz edir! Mükəmməl driblinqləri və çaşdırıcı fintləri ilə rəqibə göz açmağa imkan verməyən “B” Konferensiyası ilə qarşılaşmağa hazır olun!
Möhtəşəm qarşılaşma noyabrın 26-da, saat 15:00-da MFL-in “doğma divarları” arasında – “Sportster” meydançasında baş tutacaq. Bütün küçə futbolu həvəskarlarını bu qarşılaşmanı meydanında izləməyə dəvət edirik. Oyun MFL-in facebook səhifəsində canlı yayımlanacaq. Medianın da dəvət olunacağı bu mükəmməl qarşılaşmadan əvvəl və sonra konferensiyaların ulduzları ilə müsahibələr, eləcə də peşəkar çəkiliş planlaşdırılır.
“MFL All Stars” qarşılaşmasının qalibini nə gözləyir? Bu döyüşdən qalib ayrılan komanda dünyanın futbol ulduzları ilə görüşəcək! Bir zamanlar azarkeşlər tribunasından izlədikləri əfsanəvi oyunçuların rəqibinə çevriləcəklər!
1news.az
