Deputatdan Məhərrəm ayında keçirilən dini tədbirlərlə bağlı çağırış
“Müsəlmanlar üçün həssas bir dövrdə - Məhərrəm ayında Londondakı səfirliyimizdə törədilmiş bu təxribat başqa məqamlardan da xəbər verir”.
Bunu 1news.az-a açıqlamasında Milli Məclisin deputatı Naqif Həmzəyev deyib.
Deputat bildirib ki, Xüsusi xidmət orqanlarımız daha həssas və daha məsuliyyətli davranaraq təxribatı törətmiş qrupları və qruplaşmanın arxasında duran qüvvələrin kimliyini mütləq müəyyənləşdirməlidirlər.
“Məhərrəm ayında keçirilən dini tədbirlərdə hər bir Azərbaycan vətəndaşı həssas olmalıdır və bacardığımız qədər çalışmalıyıq ki, baş verə biləcək təxribatların qarşısını alaq. Hər kəs həmrəylik nümayiş etdirməlidir. Din pərdəsi altında insanlarımızı arasında çaşqınlıq yaradılmasına, təxribatlar törədilməsinə qətiyyən imkan vermək olmaz. Hər kəs cənab prezidentin ətrafında sıx birləşməlidir. Bizim gücümüz birliyimizdə və dəmir yumruğumuzdadır” – deputat vurğulayıb.
Ayşən İsmayılova
