Zelenski İzyum şəhərində kütləvi məzarlıq tapıldığını açıqlayıb
Ukrayna prezidenti Zelenski Rusiyadan geri qaytarılan İzyum şəhərində kütləvi məzarlıq tapıldığını açıqlayıb.
Müharibənin başladığı 24 Fevral tarixindən bəri daha çox müdafiə mövqeyində olan Ukrayna ordusu avqustun son günlərində hücuma keçərək cənub bölgəsinin bəzi kəndlərini azad edib.
1news.az "ensonhaber" saytına istinadən xəbər verir ki, İzyum şəhərinə səfər edən Zelenski kütləvi məzarlıq tapıldığını açıqlayıb:
"Xarkov vilayətinin İzyum şəhərində kütləvi insan cəsədləri aşkarlanıb. Orada lazımi araşdırmalar aparılır. Daha çox və daha dəqiq məlumatlar sabah olacaq. Həmçinin, sabah İzyumda ukraynalı və beynəlxalq jurnalistlər olacaq. Dünyanın həqiqətən də nə baş verdiyini və rus işğalının nələrə səbəb olduğunu görməsini istəyirik”.
“Rusiya hər yerə ölüm yayır”
Əvvəlcə Buça, sonra Mariupol və indi də İzyum. Rusiya hər yerə ölüm yayır və buna görə məsuliyyət daşımalıdır. Rusiyanın bu müharibəyə görə məsuliyyət daşımalı olduğunu bütün dünya qəbul etməlidir. Bunun üçün hər şeyi edəcəyik”, - deyə o bildirib.
Ayşən İsmayılova
