Cavid Osmanov: “Onlar rəşadətli ordumuz qarşısında tab gətirmədikləri üçün mülki əhalini hədəf alırdılar”
“Ermənilər istər Birinci Qarabağ müharibəsi, istərsə də İkinci Qarabağ müharibəsi boyunca Azərbaycana qarşı hərbi cinayətlər törətmişdilər”.
Bu sözləri 1news.az-a açıqlamasında Milli Məclisin deputatı Cavid Osmanov deyib:
“Buna xalqımıza qarşı edilən etnik təmizləmələr, Xocalı, Meşəli, Qaradağlı və digər ərazilərdə mülki əhaliyə qarşı törətdikləri hərbi cinayətlər, o cümlədən də 44 günlük Vətən müharibəsində döyüş meydanından yüzlərcə kilometr aralıda yerləşən Azərbaycanın şəhər və rayonlarını qadağan olunmuş ballistik və kasetli raketlərlə, həmçinin ağır artilleriyadan atəş açmaları nəticəsində mülki şəxsləri birbaşa hədəf almaları aiddir. Gəncə, Bərdə, Beyləqan, Tərtər, Goranboy, Yevlax, Ağcabədi, Xızı və digər yaşayış məntəqələrinə xüsusən də gecə saatlarında mülki əhalini hədəf alaraq atəş açmışdılar və nəticədə 44 günlük Vətən müharibəsi boyunca 12-si uşaq, 27-si qadın olmaqla 93 mülki şəxs həlak olmuş, 454 nəfər yaralanmışdır. O cümlədən 12 292 yaşayış və qeyri-yaşayış sahəsinə, 288 nəqliyyat vasitəsinə və infrastruktura ciddi ziyan vurulmuşdur.
Gəncə şəhərinə 5 dəfə raket atəşi ilə hücum edilib. 2020-ci il 4, 5, 8,11, 17 oktyabr tarixlərində Skat və "Toçka" raketləri ilə atəş açmışdılar. Onlar rəşadətli ordumuz qarşısında tab gətirmədikləri üçün mülki əhalini hədəf alırdılar. Bununla da Azərbaycanın döyüş ruhunu sındırmağa, xalqın gözünü qorxutmağa çalışırdılar. Bu raketlərin əksəriyyətini Ermənistan ərazisindən atmaqla Azərbaycanı təxribata sövq etməyə çalışırdılar. Amma 44 günlük Vətən müharibəsində Azərbaycan ordusu müzəffər Ali Baş komandanımızın rəhbərliyi ilə döyüş meydanından bir addım belə geri çəkilmədən yalnız irəli gedərək bütün şəhidlərimizin qisasını aldı.
İstər həmin, istərsə də ondan sonrakı dövrdə Ermənistana törətdikləri hərbi cinayətlərə görə beynəlxalq ictimaiyyət tərəfindən ciddi təzyiq göstərilməyib və Ermənistanın hərbi cinayətlərinə bu gün də göz yumulur. Ermənistanın xalqımıza qarşı hərbi cinayətləri və terroru bu gün də davam edir. İşğal dövründə basdırılmış və sayı bir milyondan çox olan minalar, həmçinin Vətən müharibəsindən sonra basdırılmış qadağan olunan piyada əleyhinə minalar və törədilən hərbi təxribatlar Ermənistanın hərbi cinayətlərinin davamıdır.
Azərbaycan isə Ermənistan mülki şəxslərini hədəfə almamış və bütün müharibə qaydalarına uyğun şəkildə ləyaqətli bir müharibə aparmışdır”.
Ayşən İsmayılova
