PA rəsmisi: “Mülki insanların hədəfə çevrilməsi Ermənistan rəhbərliyinin idarəetməsində ideoloji xəttə çevrilib”
“Azərbaycanın mülki şəhərlərinin ballistik raketlərlə atəşə tutulmasının, 100-ə yaxın mülki şəxsin həlak olması, 500-ə yaxın yaralının olmasının məsuliyyəti Ermənistanın hərbi-siyasi rəhbərliyinin üzərinə düşür”.
1news.az xəbər verir ki, bunu Gəncədə diplomatik korpusun nümayəndələri üçün keçirilən brifinqdə Prezident Administrasiyasının Kommunikasiya siyasəti sektorunun müdiri Cavid Musayev deyib.
Vətən müharibəsi zamanı Gəncə, Tərtər, Goranboy, Bərdə, Mingəçevir və digər rayonlar Ermənistan tərəfindən ballistik raketlərlə atəşə tutuldu.
Nəticədə 11 uşaq, 27 qadın olmaqla ümumilikdə 93 nəfər mülki şəxs həyatını itirdi.
"Mülki insanların hədəfə çevrilməsi Ermənistan siyasi rəhbərliyinin idarəetməsində sanki ideoloji xəttə çevrilib. 100 illik tarixə ekskursiya etsək, 1918-ci ildə azərbaycanlıların soyqırımı, 1992-ci il Xocalı soyqırımı, 1993-cü il Başıbel qətliamı, bu gün bizim burada iştirak etdiyimiz 44 günlük Vətən müharibəsi zamanı Ermənistan tərəfindən atılan raketlər zamanı həlak olan və yaralananlar anım günü. Bütün bunlar Ermənistan siyasi rəhbərliyinin ideoloji idarəetmə xəttinin göstəricisidir".
Foto: Nadir İbrahimli
