“Bütün xalqımız Sizinlə də, ordumuzla da, əsgərimizlə də fəxr edir” – Ali Baş Komandana məktub
Məlum olduğu kimi, iyulun 12-də günorta saatlarından başlayaraq Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu sahəsində atəşkəs rejimini kobud şəkildə pozaraq artilleriya qurğularından istifadə etməklə mövqelərimizi atəşə tutublar.
Azərbaycan vətəndaşları məsələ ilə bağlı Prezident İlham Əliyevə çoxsaylı məktublar ünvanlayıblar.
Bu haqda 1news.az dövlət başçısının rəsmi saytına istinadla həmin məktubların bir qismini təqdim edir.
Çiçək Əkbərovadan, Quba, Azərbaycan
“Hörmətli cənab Prezident.
Təbiət bizim yurdumuzu misilsiz gözəllik diyarı yaradıb. Sizin diqqət və qayğınız sayəsində bu gözəllik hər il birə beş artır. Təsadüfi deyil ki, Qubanın inkişafı, gözəlliyi barədə məlumatlar bütün dünyanı gəzir. Bu gözəllik ona görə cəzbedicidir ki, müasir infrastruktur yaradılmış, rahat yollar çəkilmişdir.
Mənim 70 yaşım var. Uzun illər sovxozda çalışmışam. Hazırda maldarlıqla məşğulam. Kəndimizin gözəl təbiəti var. Lakin son vaxtlar kəndimizdə görülən işlər bu gözəlliyi görmək istəyənlərə daha rahat şərait yaradır.
Sizin qayğınız sayəsində kəndimizə yeni yol çəkildi. Bu hadisə kənd sakinlərinin sevincinə səbəb olmaqla yanaşı, gələcəyə inamını da artırıb.
Cənab Prezident, rayonumuzun, o cümlədən doğma kəndimizin sosial-iqtisadi inkişafına göstərdiyiniz qayğıya görə Sizə kəndimizin sakinləri adından minnətdarlığımı bildirirəm”.
Xatirə Məmmədovadan, Bakı, Azərbaycan
“Hörmətli cənab Prezident.
Bu məktubumla hər zaman xalqın qeydinə qaldığınıza görə Sizə minnətdarlığımı bildirmək və əmin-amanlığımızın qarantı olan Milli Ordumuza dəstəyimi ifadə etmək istəyirəm.
Əvvəl-axır torpaqlarımızı qaytaracağımızı bilən düşmənlərimiz qəsdən təxribata əl atır. Lakin arzuları ürəklərində qalacaq.
Mən və övladları cəbhədə olan bütün analar Sizə, komandanı olduğunuz ordumuza güvənir, müasir döyüş texnikasına sahib əsgərlərimizin qələbə ruhuna inanırıq.
Sizə, ordumuza uğurlar arzu edirəm. Bu gün cəbhə bölgəsində düşmənin önünü kəsən zabit oğlumun anası olduğum və Hərbi Hospitalda əsgərlərimizə xidmət etdiyim üçün çox qürurluyam.
İnanıram ki, haqq işimiz, arzumuz olan torpaqlarımızın azadlığı yaxın günlərdə hamımıza Qələb sevinci yaşadacaq”.
Yazgül Quliyevadan, Bakı, Azərbaycan
“Hörmətli cənab Prezident.
Bu gün qüdrətli Azərbaycan və onun Ordusu xalqımızın qürur mənbəyidir. Siz çıxışlarınızdan birində vurğuladığınız kimi: “Bu gün hər bir Azərbaycan vətəndaşı haqlı olaraq Azərbaycan Ordusu ilə fəxr edə bilər və biz əsgərlərimizlə, zabitlərimizlə fəxr edirik”. Bütün xalqımız Sizinlə də, ordumuzla da, əsgərimizlə də, zabilərimizlə də fəxr edir.
Biz qadınlar da ölkəmizdə baş verən hadisələrə biganə qala bilmərik. Azərbaycan vətəndaşı olaraq hər zaman dövlətimizim başçısının, hərbçilərimizin yanında olduğumuzu bildiririk.
Allah ölkəmizi hifz etsin”.
Salman Veysəlovdan, Qəbələ, Azərbaycan
“Hörmətli cənab Prezident.
Bu günlər Azərbaycanda birlik günləridir. Ölkəmizin elə bir bölgəsi yoxdur ki, oradakı insanların ürəyi döyüşdə olan əsgərlərimizlə birlikdə döyünməsin.
Cənab Prezident, işğaldan azad edilən Cocuq Mərcanlıda yaşayışın bərpa edilməsi doğma torpaqlara qayıdışın başlanğıcıdır. Əminik ki, Sizin qətiyyətli siyasi kursunuz, xalqın böyük inamı və ordumuzun gücü hesabına torpaqlarımız işğaldan azad ediləcək, üçrəngli dövlət bayrağımız Azərbaycanın əbədi müstəqilliyinin rəmzi olaraq Qarabağda qürurla dalğalanacaqdır.
Həmin günlərin şahidi olmağım üçün könüllü olaraq döyüş bölgəsinə göndərilməyimlə bağlı əmrinizi gözləyirəm”.
Namiq Balakişiyevdən, Şabran, Azərbaycan
“Hörmətli cənab Prezident.
Bu gün Azərbaycan Ordusunun dünyanın ən güclü orduları sırasında yer alması təsadüfi xarakter daşımır. Bunu təmin edən amil ümummilli lider Heydər Əliyevin əsasını qoyduğu nizami və güclü ordu quruculuğu siyasətinin Sizin tərəfinizdən uğurla davam etdirilməsidir.
Cənab Prezident, mən idmançıyam, hərbi xidməti başa vurmuşam. Qürurla bəyan edirəm ki, Vətənin müdafiəsində iştirak edərək qəhrəmanlıq göstərəcəyəm. Mənə - Sizin sadiq əsgərinizə güvənə bilərsiniz. Sizin əsgəriniz olmaq mənim üçün böyük şərəfdir. Bütün əmrlərinizə hazıram”.
Mövzu ilə əlaqədar oxuyun:
“Hər zaman yanımızda olduğunuz üçün Sizə təşəkkürümü bildirirəm” – Prezidentə yazırlar
“Biz Sizə inanır, güvənir və arxalanırıq” – Prezidentə yazırlar
S.Xankişiyeva
