“ABŞ Azərbaycan-Ermənistan arasında atəşkəsin əldə edilməsində rol oynamayıb” - Elman Nəsirov
“Amerika Birləşmiş Ştatları Azərbaycan-Ermənistan arasında atəşkəsin əldə edilməsində rol oynamayıb”.
Bu sözləri 1news.az-a açıqlamasında Milli Məclisin deputatı Elman Nəsirov bildirib. Onun sözlərinə görə, bu məsələdə Rusiya daha çox səy göstərən tərəflərdən biri olub:
“Sentyabr ayının 12-14-də Ermənistan Silahlı Qüvvələrinin törətdiyi genişmiqyaslı hərbi təxribat aqressorlar, yəni ermənilər üçün olduqca fəlakətli oldu. Erməni mətbuatının yazdığına görə, 500 nəfərə qədər itkilər veriblər. Bu rəqəm hətta daha da çox ola bilər. Əgər ermənilər bu hərbi avantüranı dayandırmasa idilər Ermənistanın üzləşdiyi fəlakətin miqyası daha da böyük ola bilərdi. Xüsusi olaraq qeyd edim ki, atəşkəsin əldə olunmasında Rusiya tərəfi daha fəal iştirak etdi. Rusiya Prezidenti Vladimir Putin Ermənistanın Baş naziri Nikol Paşinyanla telefon danışığı apardı. Həmçinin Rusiyanın XİN naziri ilə Azərbaycan XİN nazirinin danışıqları və digər qurumların bu prosesə qatılması Rusiyanın atəşkəsin əldə olunmasındakı səyinin daha çox olduğunu göstərir. Rəsmi Moskva yaranan vəziyyətdən çıxış yolu tapmaq üçün bir sıra addımlar atdı".
"Amma son zamanlar KİV-də belə məlumatlar yayılıb ki, 2 günlük davam edən Ermənistan hərbi avantürasının dayandırılması prosesində və atəşkəsin əldə edilməsi prosesində ABŞ əsas rol oynayıb, lakin ortada bunun heç bir əlaməti yoxdur" - deyə, deputat əlavə edib:
"Ən yaxşı halda ABŞ dövlət katibi Entoni Blinkenin həm Azərbaycan Prezidenti, həm də Ermənistanın Baş nazirini ilə telefon danışıqları olub və bu da prosesə elə də təsir edə bilməyib. ABŞ Konqresinin Nümayəndələr Palatasının spikeri Nancy Pelosi erməni lobbisinin dəstəyi ilə Ermənistana getməsi və səsləndirdiyi fikirlər də ona dəlalət edir ki, Birləşmiş Ştatlar bu məsələrdə yardımçı mövqe rolunu oynamayıb”.
Aynurə Xudaverdiyeva
