“Praqa görüşünün sülh prosesinin başlaması baxımından mühüm əhəmiyyət kəsb edən görüş olduğunu düşünürəm” – Politoloqdan ŞƏRH
“Şübhəsiz ki, bundan sonra önəmli məsələ sərhədlərin delimitasiyası prosesidir”.
Bu sözləri 1news.az-a açıqlamasında siyasi ekspert Elçin Mirzəbəyli deyib.
“Praqa görüşünün sülh prosesinin başlaması və intensivliyi baxımından mühüm əhəmiyyət kəsb edən görüş olduğunu düşünürəm. Təbii ki, bundan sonrakı proses ilk növbədə Ermənistanın öz öhdəliklərinə necə əməl edəcəyi ilə bağlıdır. Önəmli olan məqam yekun bəyanatda dövlətlərin bir-birinin ərazi bütövlüklərini qarşılıqlı şəkildə və BMT nizamnaməsinə uyğun olaraq tanımalarıdır. Bu da prinsip etibarilə Ermənistanın Azərbaycan mövcud şəraitləri və BMT-yə daxil olduğu zaman mövcud olan sərhədləri çərçivəsində ölkəmizin ərazi bütövlüyünü tanıması, həmçinin hazırda Rusiya sülhməramlılarının müvəqqəti müşahidəsi altında olan Azərbaycan ərazilərində yaşayan etnik ermənilərin olduğu yaşayış məntəqələri üzərində də ölkəmizin suverenlik hüqunun bərpa olunmasıdır. Bu faktiki olaraq Ermənistanın hansısa bir Qarabağ məsələsi kontekstindən yenidən manipulyasiya etmək cəhdlərini müəyyənləşdirir. Yəni Azərbaycan ərazisində yaşayan etnik ermənilərlə bağlı məsələnin Azərbaycanın daxili işi olduğunu qəbul edir.
Şünhəsiz ki, bundan sonra önəmli məsələ sərhədlərin delimitasiyası prosesidir. Ermənistan Azərbaycanın ərazi bütövlüyünü tanıyırsa, bu həm də sərhədlərinin toxunulmazlığı anlamına gəlir. Bu o deməkdir ki, delimitasiya prosesinin daha sürətli və intensiv şəkildə həyata keçirilməsinə imkan yaradacaq.
Bütövlükdə Azərbaycanın öz maraqlarını müdafiə etməsi baxımından və Ermənistanın yenə də prosesə əlavə dəstəkçi cəlb edilməsinin iflasa uğraması baxımından da önəmli sayıla bilər”.
Ayşən İsmayılova
