“Cənab Prezident, Siz hər bir addımınızla xalqımızın yanında olduğunuzu sübut edirsiniz” – Minnətdarlıq məktubları
Prezident İlham Əliyevin dünyada tüğyan edən koronavirus pandemiyasının Azərbaycanda geniş yayılmasının qarşısının alınması, insanların sağlamlığının qorunması və rifahının yaxşılaşdırılması ilə bağlı verdiyi qərarlar vətəndaşlarımız tərəfindən böyük rəğbətlə qarşılanır.
Görülən işlər dövlətimizin başçısının xalqımıza diqqət və qayğısının bariz nümunəsi kimi qiymətləndirilir. Azərbaycan vətəndaşları bu diqqət və qayğıya görə Prezident İlham Əliyevə minnətdarlıqlarını ona ünvanladıqları çoxsaylı məktublarda ifadə edirlər.
Bu haqda 1news.az dövlət başçısının rəsmi saytına istinadla həmin məktubların bir qismini təqdim edir.
Qabil Mehdiyevdən, Bakı, Azərbaycan
“Möhtərəm cənab Prezident.
Azərbaycan milli mətbuatının 145 illik yubileyinin keçirilməsi ilə bağlı imzaladığınız Sərəncam ölkə mediasına verdiyiniz böyük dəyərin və etimadın növbəti nümunəsidir. Jurnalistlərin dostu olaraq, Siz həmişə mətbuatımızın yanında olmusunuz, milli jurnalistika ənənələrimizin yaşadılmasına və inkişaf etdirilməsinə böyük töhfə vermisiniz. Ölkə mediasına dəstəyiniz idman jurnalistikasını da Sizin qayğınızdan kənarda qoymur.
İdman Jurnalistləri Federasiyasının fəaliyyətə başlaması da Sizin bu sahəyə diqqət və qayğınızdan irəli gələrək, bədən tərbiyəsi və idmanın kütləviliyinin təbliğinə, idman mediasının inkişafına xidmət edir. Biz - idman jurnalistləri Sizin Azərbaycan dövlətinin müstəqilliyinin möhkəmləndirilməsi uğrunda apardığınız mübarizəni, ölkə daxilində və xaricində gördüyünüz işləri və atdığınız bütün addımları bundan sonra da dəstəkləyəcəyimizi bir daha bəyan edirik.
Sonda bir daha İdman Jurnalistləri Federasiyası İctimai Birliyinin üzvləri, bütün idman jurnalistlərimiz adından mətbuata göstərdiyiniz diqqət və qayğıya görə Sizə dərin minnətdarlığımızı bildiririk”.
Əfqan Həsənovdan, Şirvan, Azərbaycan
“Hörmətli cənab Prezident.
Sizi bütün şirvanlılar və Şirvan gəncləri adından səmimi qəlbdən salamlayıram. Sizə xalqımızın sosial rifah halının yaxşılaşdırılması, dövlətimizin daha da inkişafı istiqamətində gördüyünüz işlərdə uğurlar arzu edirəm. Hazırda koronavirus pandemiyası bütün dünya ölkələrini çətin vəziyyətə salıb.
Ölkəmizdə də virusun mənfi izlərini görürük. Lakin danılmaz faktdır ki, məhz Sizin uzaqgörən fəaliyyətiniz, qabaqlayıcı tədbirləriniz sayəsində Azərbaycan bu pandemiyadan minimum zərərlə çıxmağa doğru gedir. Son günlərdə koronaviruslu xəstələrin müalicəsi üçün açılan modul tipli xəstəxanalar Sizin vətəndaşlarımızın sağlamlığına nə qədər dəyər verdiyinizin və xalqımızı qoruduğunuzun nümunəsidir.
Cənab Prezident, Siz hər bir addımınızla xalqımızın yanında olduğunuzu sübut edir və hər bir azərbaycanlının Prezidenti olduğunuzu bir daha təsdiqləyirsiniz. Azərbaycan xalqının rifahı, ölkəmizin inkişafı, beynəlxalq nüfuzunun yüksəldilməsi istiqamətində gördüyünüz işlərdə Sizə müvəffəqiyyətlər arzu edir, dərin təşəkkürümüzü və minnətdarlığımızı bildirirərək Allahdan Sizə möhkəm cansağlığı arzulayırıq”.
Larisa Ağayevadan, Abşeron, Azərbaycan
“Hörmətli cənab Prezident.
Sizin bütün sahələrdəki fəaliyyətiniz təqdirəlayiqdir. Xüsusilə səhiyyəyə göstərdiyiniz qayğı Azərbaycanda koronovirus pandemiyasına qarşı mübarizədə yaxşı nəticələr əldə etməyə böyük kömək oldu. Tövsiyələrinizə uyğun olaraq əvvəldən görülən tədbirlər olmasaydı hadisələrin gedişatını təsəvvür etmək belə istəməzdim.
Siz hər bir vətəndaşın sağlamlığının qorunması üçün mümkün olan hər şeyi edirsiniz.
Mən və həyat yoldaşım koronovirus infeksiyasına tutulandan sonra M.Ə.Əfəndiyev adına 2 saylı Şəhər Klinik Xəstəxanasına yerləşdirildik. Xəstəxanada bizə göstərilən qayğıya, tibbi personalın yüksək peşəkarlığına görə Sizə və Mehriban xanıma təşəkkür edirik.
Xəstəxanada lazım olan dərman və ləvazimatlarla təmin olunduq. Dezinfeksiya və təmizlik işləri də vaxtında yerinə yetirilirdi. Tibbi personal yorulmadan, öz sağlamlığını təhlükəyə ataraq daha çox insanı xilas etmək üçün gecə-gündüz çalışır.
Biz artıq Sizin sayənizdə sağalaraq evimizə dönmüşük. Bir daha gördüyümüz diqqət və qayğıya görə Sizə və Mehriban xanıma minnətdarlığımızı bildirir, gələcək fəaliyyətinizdə uğurlar arzulayıram”.
Mövzu ilə əlaqədar oxuyun:
“Hər zaman yanımızda olduğunuz üçün Sizə təşəkkürümü bildirirəm” – Prezidentə yazırlar
“Biz Sizə inanır, güvənir və arxalanırıq” – Prezidentə yazırlar
S.Xankişiyeva
